tatsoft

Татарстан Республикасының фәннәр академиясе
Бу сайт заманча мәгълүмат-коммуникация технологияләрендә татар телен куллану белән кызыксынган һәркемгә файдалы булачак. Бүгенге көндә мәгълүмат технологияләре, тормышыбызның барлык өлкәләренә дә үтеп кереп, дөньядагы телләрнең һәм мәдәниятләрнең күплеген һәм төрлелеген дә исәпкә алалар. Компьютерлар һәм мобиль җайланмалар хәзер безнең белән инде инглизчә яки русча гына түгел, ә туган телебездә дә “аралашалар”. Татарстан Республикасының дәүләт теле һәм Татарстанда, Россиядә һәм бөтен дөньяда яшәүче миллионлаган кешенең туган теле буларак, татар теле мәгълүмат технологияләрендә инде күптән үз лаеклы урынын тапкан. Заманча мәгълүматлаштыру һәм элемтә чаралары белән эшләгәндә туган телебезне кулланырга теләгән милләтәшләребезнең саны артканнан-арта бара, чөнки компьютер белән туган телдә аралашканда, сүзләр һәм җөмләләр аңлаешлырак була һәм кеше игътибарны тулысынча үзенең эшләгән эшенә юнәлтә ала. Шул мөмкинлекләр тормышка ашсын өчен, локализация кулланыла. Бу – программа тәэминатын халыкның яки төбәкнең милли-мәдәни үзенчәлекләренә җайлаштырудан гыйбарәт булган махсус тәрҗемә төре. Локализация барышында милли телдә текст җыю, төзәтү һәм бастырудан алып, интерфейс элементларын, белешмә файлларны һәм башка эчтәлекне тәрҗемә итүгә кадәр мәсьәләләр хәл ителә.

Дәүләт программалары кысаларында башкарылган башка проектлар